孩子都是父母的心肝寶貝，但在成長過程之中，一定會遇到各種問題，身為家長在這個時候，都急住想要孩子知道是非對錯，一時忍唔住就大發脾氣，有理無理大鬧一餐，其實可以試試問孩子這六個問題，聽下佢地的諗法。而其實問呢幾個問題亦可以更清楚知道發生咩事，實際解決件事。家長一齊來試下，問問以下問題：
問題一：到底發生咩事呀？
這個問題看似無意義，其實非常重要，因為父母每遇到突發事情，都習慣用自己的方式思考而落判斷，「一定係你唔乖啦！」「一定係你先郁手打小民，佢先會打返你。」「一定係你做錯事，老師先會罰你。」但如果我地唔俾孩子從佢的角度講返事情經過，淨係用自己固有想法判斷往往有盲點，亦好有可能會冤枉孩子。這個時候俾機會孩子說話，講返事情經過，即使真係佢錯，佢都會因為有機會解釋而更甘心認錯，同時都可以訓練佢的敘述能力，等佢可以清楚表達自己的諗法。
問題二：你有咩感覺？
當孩子講出事實經過，佢會在敘述過程中諗返成件事，同時搵出問題癥結所在，這時候問第二個問題就可以俾佢抒發情緒，因為佢自己心裡所受到的衝擊純粹係主觀感受，並無所謂對或錯。很多時，我地只係想將自己的感受講出來。一旦講出來，喊一喊，鬧一鬧，心情就會好多了。腦科學研究已指出，當一個人情緒強烈的時候，外來刺激不容易被腦部吸收、也不容易做正確判斷。咁樣亦表示當一個人好嬲的時候，其他人講咩都聽唔入耳。總要等佢情緒平伏下來，先可以冷靜思考問題同做正確決定，所以如果我地想孩子可以聽到我地的意見，就需要先了解佢的感受，等佢情緒有個出口，講講自己的委屈。
問題三：咁你覺得有咩解決辦法呢？
這個問題的背後係想俾孩子學會獨立思考，可以不妨同佢一齊做腦力震盪，引導佢諗出解決問題的方法，諗下唔同的計仔，可以唔使理合唔合理，可以好荒謬、好好笑、好無聊、好噁心、好幼稚…過程重點係唔好限制任何瘋狂的諗法，而且唔理聽到咩，都暫時唔好做批評或者判斷。當你地再諗唔到新計仔的時候，可以問下一題。
問題四：這些方法會有咩後果？
當腦力震盪告一段落，孩子的情緒平伏左、也瘋狂地提出左諗法，這時候俾機會佢自己一一檢視，每個方法會帶來咩後果。如果佢的認知有差距或是想法有偏差，這時候就可以好好同佢討論，將佢的想法矯正過來，等佢明白現實真相。這是一個很好的親子溝通機會，但係唔好掛住講道理和急住落結論，只需要陳述事實即可。
問題五：咁你決定點做？
撇開成年人的諗法，孩子一定會揀對自己最有利的解決辦法，其實如果佢了解後果，通常會做出最合理、最明智的選擇。這時候大人最緊要講得出做得到，唔可以先問左佢的決定，又話俾佢知咁樣唔得，咁孩子以後都唔會再信任你了。而且，就算佢選擇錯誤，能夠從錯誤中學習都係一個難能可貴的教訓。
問題六：結果點樣？事情係唔係同你想像中一樣呢？
也可以問佢「下次遇到同樣情況，你會點做呢？」強迫佢思考下次遇到同樣問題應該如何反應，並等佢有機會檢視自己的判斷和行為，並做出正確決定，家長也學著放手讓他承擔責任和後果。咁樣練習幾次，以後遇到問題孩子都會自己思考前因後果，從而諗出正確解決辦法。孩子就會有自己解決問題的能力，不再需要父母操心了。
經典六問：
問題一：到底發生咩事呀？
問題二：你有咩感覺？
問題三：咁你覺得有咩解決辦法呢？
問題四：這些方法會有咩後果？
問題五：咁你決定點做？
問題六：結果點樣？事情係唔係同你想像中一樣呢？ / 下次遇到同樣情況，你會點做呢？
父母教育是孩子一輩子的事，若果想孩子對自己的行為負責，就唔好剝奪佢地履行負任的機會。要俾佢地學習處理自己的事情，並為自己的決定承擔後果，從而達到培養孩子責任感和負責任的態度。這樣孩子才能養成獨立思考並解決問題的能力，父母們一起來試試看吧！
