最近睇返上年2月時候自己記錄的點滴， 當時係懷孕初期見紅，我要在家bed rest的日子。原來當時孖爸同自己都有煲好多靚湯來養胎。以家分享返我地當時懷著孖寶養胎的湯水啦~

推薦閱讀：安心又暖心！自製滴雞精影音作法大公開

雪耳含有營養豐富，高蛋白質和氨基酸，能養陰補肺，更含植物性的化學成分，當中的蛋白質就含有17種氨基酸，其中7種更是人體必須的氨基酸，有促進新陳代謝的功效。更加有養顏功效，保持皮膚光滑和具彈性、減少皺紋，因為雪耳含有豐富的膠質；能幫助身體產生骨膠原。不過個別孕婦都要留意返自己適唔適合食用雪耳呀，因為有說法話雪耳可能會滑腸。

每人的體質不同，大家要自己留意返自己適唔適合呀！

螺片的功效係滋陰補腎，而且係高蛋白質又低脂肪的。加埋蘋果個湯真係好甜，可以當係家常靚湯都OK架。

節錄返當時文字:[醫生要媽咪在家休息多一星期，媽咪有時間就煲煲靚湯比你地飲啦。

推薦閱讀：冬季幼兒食譜，精選２１款小補湯大全！

蘋果瘦肉雪耳螺片湯

材料:
豬肉 1/2 斤
蘋果 4個
蜜棗 6粒
雪耳 3顆
螺片 4片
水 大約3-4 公升

推薦閱讀：媽媽孕期補對胎，寶寶天生麗質

做法:
1. 把豬肉（整塊）放進冷水裏煮約5分鐘後，讓其血水去掉，用冷水洗乾淨。
2. 蘋果去皮，去核，然後每一個切成4份。
3. 把蜜棗、雪耳洗乾淨，備用。
4. 把材料放進一個大鍋子裏，加入水，用大火去煮，然後用小火煮約1 1/2小時後，即可。
【荔枝與孖寶】授權轉載 原文出處【回顧孕期滋補湯水: 蘋果瘦肉雪耳螺片湯】

The post 【食譜】孕期滋補湯水：蘋果瘦肉雪耳螺片湯 appeared first on MamaClub HK | 媽媽嘅專屬資訊平台.

以家孖寶食早餐、午餐、下午茶、晚餐，每餐都要預防不同的食物比佢地，有時真係要諗多d唔同花款去增加佢地的食慾。以下同大家分享既就係簡單易做，零失敗的芝士麻糬波波，濃郁的芝士味真係好正呀！孖寶大愛的下午茶小食一員。

推薦閱讀：【食譜】免出國！京都伴手禮「生八橋」自己做

材料:

糯米粉 110g
木薯粉 15g
Parmesan芝士粉 35g
鹽 5g (原食譜15g，不過我比BBs食，所以大量減鹽)
雞蛋 1隻
無鹽牛油溶液 40g
牛奶 70ml
(以上材料大約可以做到18-22粒左右)

步驟:

1/ 首先將無鹽牛油溶化成為溶液；

2/ 將無鹽牛油溶液同雞蛋拌勻；

3/ 將糯米粉、木薯粉先過篩1次；再加入芝士粉、鹽備用；

推薦閱讀：寶寶點心時間的最佳零食-HEINZ亨氏蘋果手指餅乾

4/ 然後預先已準備好的牛油溶液同蛋液拌勻

5/ 之後逐小加入牛奶搓成麵糰(不一定需要哂所有牛奶，大家自己留意如果麵團太乾，可加多一d牛奶，相反如果麵團太濕，就加一d糯米粉）

6/ 預熱焗爐180℃

7/ 將麵團分成小份 (湯圓大小)，搓圓，放在已鋪了烘焙紙的烤盤上

8/ 放入已預熱焗爐，焗 20分鐘至金黃，取出即成。

9/ 關爐後馬上取出，趁熱享用。

推薦閱讀：【烤箱食譜】吃到停不下來的香Q地瓜麻糬球

孖媽小貼示：

1/ 留意每一個焗爐都可能會有溫差，請大家留意個別焗爐情況再調節烘焙溫度和時間呀！
2/ 芝士碎唔一定要用Parmesan，呢個只係個人口味，大家可以轉用採用Emmental、Mozzarella等等都得架。
【荔枝與孖寶】授權轉載 原文出處【BB版日式濃郁芝士麻糬波波】

The post 【食譜】又香又濃的BB版日式芝士麻糬波波 appeared first on MamaClub HK | 媽媽嘅專屬資訊平台.

最近利用一些小運動的小遊戲練習，來更進一步幫助佢地五感，前庭同本體的發展，孖媽觀察到佢地的動作開始比之前的表現更好。

而且最重要係佢地玩得好開心、好enjoy，收哂野之後，哥哥仲不停講住話要做體操，細佬又不斷要搵嫲嫲助教同佢地一齊玩，好搞笑，呢一點係我最開心的地方，因為佢地真係喜歡玩這個活動，我花再多心思去想，努力學習，應用係佢地身上，一切一切都係值得的。

讀書／學術可能係好多家長都會特別注意的一環，但其實小朋友每天有適量的運動，多走動對前庭同本體的發展都係好好，即係對個人成長係好有幫助。簡單同大家講一下Sensory Integration 其實即係小朋友由來自環境中的感覺訊息作選擇性的吸收，再加以組織、整理，令小朋友的個體可以適當運用其肢體、情緒與環境互動。

唔講大家可能唔知，其實係五感之中，觸覺是最基本、影響力最大的系統。觸覺是提供我們有關周圍環境的訊息最主要的來源，可以令小朋友避開或抵抗危險，同時，觸覺對小朋友心理社會化的發展，非常的重要。小朋友經由觸覺，在早期，可以和媽媽建立親密的關係，而在以後，可以幫助發展良好的人際關係基礎。另外，在手部動作方面，觸覺和區辨覺的建立，可以促進小朋友對物體形狀、大小、重量的認識，是往後認知發展重要的基石。

孖媽今次set呢個紅色圓圈形一條條的路，仲有要孖實行呢個半圓形榴蓮球腳踏石，其實就正正係觸覺的練習，促進視覺運動協調，同時亦可以促進兩側協調，最重要係有助刺激觸覺，而且對促進本體同前庭感覺都有幫助。

如果係屋企無咁多設備，家長亦可以同小朋友玩手伸入觸覺箱／袋內搵玩具的遊戲，袋入面可以放唔同的野，因為孖媽喜歡天然，所以會放豆類、種子、米粒等物件來比孖寶去感覺。大家都可以試下同小朋友玩呢個簡單遊戲來刺激觸感呀！

P.S. 部份圖片節錄自互聯網

The post 走過在家自玩的日子，觸覺訓練活動 appeared first on MamaClub HK | 媽媽嘅專屬資訊平台.

講返小小體適能的basic concept、Physical Fitness體適能的定義，即係身體適應生活、外界環境（e.g.：溫度、氣候變化）的綜合能力。 體適能較好的人在日常生活或工作中，從事體力性活動或運動皆有較佳的活力及適應能力，而不會輕易產生疲勞或力不從心的感覺。根據 U.S. Department of Health and Human Services，體適能包括：心肺耐力、肌肉耐力、肌肉力量、肌肉爆發力、速度、柔軟度、靈敏度、平衡力、反應時間及身體成分。

而孖媽作為兒童體適能教練, 一般都係會以「樂趣、安全、活潑」為主，引導小朋友係快樂嘅氣氛之中玩樂，亦可以配合輕快節奏嘅音樂同遊戲，達到令小朋友身體充分活動的目的。

而我地教練係兒童體適能嘅教學上，通常會把課堂分為幾大類warm up、有氧運動、肌力訓練同cool down等，我特別想提嘅係家長要特別小心留意，係小朋友嘅階段應該以訓練小朋友的肌耐力為主，千其唔好走去訓練肌力，因為小朋友需要嘅係健康體適能，而唔係要練大隻，唔需要使用重量訓練，呢點要特別留意，以免影響小朋友發育同高度呀！當然，如果有咩唔明，最好就搵返你嘅兒童體適能教練去了解同詢問返啦！

以家哥哥仲未可以出關天天在家要跟他們想出不同的遊戲去玩，今次呢個運雞蛋嘅遊戲到底又係d咩呢？

1/ 我地呢個呢個運雞蛋嘅遊戲有唔同顏色嘅4個spoon同雞蛋set。

2/ 遊戲開始之前，可以比小朋友先認下顏色，講出各顏色嘅中、英文名稱。

3/ 之後教練就可以將雞蛋黃放入雞蛋殼內，然後教小朋友將雞蛋放在spoon上，可以正式開始遊戲啦。

4/ 一般教練可以幫小朋友畫一條起跑線，等佢地更明確知道自己要行的方向同路線。

5/ 小朋友放好手中雞蛋，就可以一齊起步快走啦，邊個最快到終點又無跌到雞蛋落地就係勝出者啦，仲要留意唔可以比蛋黃散到出來呀。

呢個小運動既可以培養孩子合群玩樂，亦可以令小朋友有進取心，最重要當然係可以訓練小朋友嘅平衡同埋手眼協調嘅能力，對視覺運動協調都有一定的幫助。

而孖媽最開心嘅就係佢地都好enjoy，可以令孩子係運動當中得到健康同樂趣就係我努力學習的原動力

哈哈，考完一張又一張，仲有好多張cert等緊我考呀…..加油孖媽！

P.S. 部份圖片節錄自互聯網

The post 在家訓練兒童體適能：運雞蛋小遊戲分享 appeared first on MamaClub HK | 媽媽嘅專屬資訊平台.

孖媽自問無論上年N班都今年K都沒有做什麼預備功夫，上年他們面對人生第一場，出發前我都只是跟他們說去好好玩一場，開開心心的做返你自己就好了。我們一共報了2家N，結果係一家是備取生，另一家最後是收了，但由於係分派到下午班，所以我們只好放棄了。不過無所謂啦，就留返出年K先開始正式讀書啦，再玩多一下無妨呀。所以我地面試的經驗其實唔係好豐富，但我都將之前睇過的一些資料，整合成一個簡易版同大家分享，方便大家。（推薦閱讀：[color-2] 雙寶媽：選幼稚園跟選老公一樣別太理想化[/color-2]）

我深信2018年K嘅學額應該係足夠，問題只係大家可唔可以入到心儀的幼稚園，仲有好多家長更會放眼睇，就係為咗升小學做好準備。

簡單講一下一d幼稚園面試大忌啦！

首先，家長最好可以放寬心情，因為如果家長出現過分緊張的表現，有機會會影響面試結果。而其中一個面試大忌就係面試個時，家長幫小朋友搶答呀。

相信大家都知道小朋友面試當日的表現其實就係學校嘅取錄關鍵，但要咁細個的小朋友控制情緒其實唔係易，如其要佢地上面試班背哂所有面試題目的答案，倒不如保持良好心態，比小朋友輕鬆d，Be Yourself做返自己無壓力，小朋友情勢自然可以比較放鬆啦。因為如果由頭喊到落尾，真係好大可能影響表現，喊就可能無法完成指令，所以老師想評分都難啦。

仲有聽好多朋友講，如果可以真係最好由父母陪小朋友去面試，雖然可能返工有時真係好難請假，仲要報咁多間in咁多間，時間真係有d難安排，但聽好多朋友講，老師通常問完陪小朋友去的照顧者（祖父母），小朋友的父母點解無一齊來之後，就無再同照顧者傾下去，轉左去同其他家長傾，咁好可能呢方面大家都要留意下啦！

其實面試唔係只係小朋友嘅事，家長亦都係評分對象之一，意思唔係要考家長識d咩知識，反而好多學校都係著重家長同孩子相處個陣嘅表現，所以家長記住留意唔好即時搶答，亦盡量唔好不斷咁催逼小朋友要快d答同老師講！小心因為咁而可能會失分呀。

因為面試個陣，老師其實係希望睇到小朋友自己的反應，如果家長太緊張，心急咁催逼小朋友作答，甚至幫孩子搶答，會令到老師好難睇到小朋友本身嘅表現，這樣更會有可能扣分。同埋當家長太過緊張個陣，小朋友其實都會feel到，咁只會令小朋友亦一起緊張，甚至怯場。所以我覺得比小朋友保持自然嘅一面，等老師可以觀察到他們嘅表達能力咁就可以好夠了。

家長常見面試問題小分享

以家有好多幼稚園都會用問卷形式來比家長填，一係就係填寫申請form個時，一併交回；另一種就係面試當日老師派比你即場填。老師亦有機會係面試個時即場再問，所以有d問題家長都應該自己的心中有個大概的標準答案先。

仲有呀家長要記下學校的背景、理念，令自己可以簡單而重點咁回答。最重要就係填問卷就要保持真實、切忌浮誇。如實講出小朋友的學習經驗同能力。

以下幾題都係一d比較常見家長面試問題，大家可以參考下:

– 點解會想揀我地學校？

– 你對小朋友有咩期望？

– 你對學校有咩期望？

– 小朋友平時係由邊個照顧？

– 平日會同小朋友去咩地方？

– 假日會同小朋友去咩地方？

– 小朋友係唔係已經戒咗片啦？

– 小朋友有咩優點？

– 小朋友有咩缺點？

– 小朋友性格上有咩特質？

其實大部份都係如實回答就好了，只係缺點就想想盡可能避重就輕，令老師想到呢個缺點都可能同時都係優點。

當然除咗父母之外小朋友當天表現亦都好重要，小朋友可唔可以定定地坐係度，老師同家長傾計時可以靜心等待。仲有係遊戲時小朋友同人的相處，分享，交流等。情緒係點都係老師會睇來評分的。亦有d可能係玩matching，認顏色，大小、形狀、考下動物名稱、食物、交通工具等。而一般積木。穿珠仔都係幼稚園面試常見的。當然小朋友的眼神動作都係老師會觀察的。

與其話幼稚園面試由入門口一刻已經評緊分(睇小朋友識唔識有禮貌問好：good morning，稱呼老師……etc) ，不如日常把常規基本的都同小朋友一齊做、一齊玩，同小朋友更親近，到時小朋友有佢最信任嘅人係身邊，自然會發揮得更好啦！

至於一切其他的壓力就交比我地大人啦，溫下學校background，諗定d答案。小朋友…就由他們自由發揮，表現出真實自然的一面。唔好咁細個就要佢地死記硬背面試班的所謂嘅model answer啦。

回想一年之前2個小人出門前我跟他們說好好去玩一場，做返你自己。一年之後我亦會同樣跟他們說Be Yourself，做返你們平常的自己，保持禮貌，自自然然對孖媽我來講已經足夠了。

相信大家的小朋友都一樣，好快要面對人生中一些面試，比小朋友開心面對面試，無壓力先係最重要。希望大家的小朋友都可以有好好的表現，做返自己，入到大家心儀嘅幼稚園啦！加油！

P.S. 部份圖片節錄自互聯網

The post 幼稚園面試大忌：家長常見面試問題 appeared first on MamaClub HK | 媽媽嘅專屬資訊平台.

今次set呢個跨欄、走半圓形榴蓮球腳踏石、仲有爬過底欄都係訓練緊唔同的身體部位同感官。簡單講一下，首先跨欄就可以幫助身體平衡能力，體適能教練可以先預備一支柱體分別固定在雪糕筒或椅子上離地around 15-20cm高，可以試下比小朋友試下雙腳輪流擡高跨欄，如果無做到雙腳唔緊要，可以先讓他們慢慢由單腳擡高跨欄做起，每個小朋友都有自己的步調，我們應該由他們能力所做到的盡量從旁輔助，太多介入反而會造成反效果，呢個跨欄對訓練小朋友平衡力，促進身體協調和邏輯思維都係大有幫助的呀！

可能大家會問，點解要對小朋友進行感統訓練呢？

因為有一d小朋友係成長過程中容易產生下列一些問題：我地做感統訓練就正正係可以幫助糾正偏差，提高學習能力，如果你發現小朋友可能注意力不集中，好動不安，沒有太大嘅自製力，成日都劇烈咁跑跳，尋求強烈刺激，又或者小朋友閱讀時易漏字、添字、容易計算錯誤、倒轉了D字來寫，又可能分不清p或q、b或d，亦有可能情緒不穩定、比較貼身、怕黑、膽小、成日喊、易衝動、動作唔係太靈敏、成日都跌跌碰碰、又可能著衫等自理能力唔係太好。感覺訊息包括視覺、聽覺、味覺、嗅覺、觸覺、本體覺和前庭平衡覺，簡單d黎講小朋友可以有效處理各感覺訊息，就更易專注學習，情緒穩定。若小朋友係觸覺、本體覺和前庭平衡覺出現問題，可能有機會會害怕被擁抱、唔敢打鞦韆同玩滑梯、執筆無力、唔喜歡跑同跳等等…..etc

我地做感統訓練就可以促進大腦功能嘅發展同成熟，從而幫助小朋友更有效地適應環境，提高小朋友嘅學習技能同體能，幫助小朋友享受成就感同建立信任感！

接下來，再講返行半圓形榴蓮球腳踏石，其實就正正係觸覺嘅練習，促進視覺運動協調，同時亦可以促進兩側協調，最重要係有助刺激觸覺，而且對促進本體同前庭感覺都有幫助。

最後，孖媽今次set呢個爬過底欄嘅setting，都係可以幫助小朋友係爬行時獲得前庭覺嘅刺激，而手腳同地面嘅接觸則可以有助觸覺嘅刺激，加上爬行需要全身都用力，因此本體覺其實亦都係可以同時得到刺激，爬行嘅時候的確手腳需要用力去支撐身體嘅重量，咁亦提供咗足夠嘅本體覺刺激比小朋友嘅大腦，仲可以令手腳嘅肌肉力量開始慢慢提升。如果有咩唔明，當然最好梗係搵返你嘅兒童體適能教練去了解同詢問返啦！

孖媽我希望將呢d好玩又可以親子訓練小遊戲整理出黎，同各位有需要嘅家長分享，其實都係一d 唔需要洗咩錢嘅遊戲。

小朋友需要嘅係陪伴，但同時佢地需要嘅亦係有智慧有方式嘅陪伴喔！希望大家都可以陪住小朋友開心玩樂中學習喔！

The post 感統訓練，不要錯失0-6歲幼兒發展黃金期 appeared first on MamaClub HK | 媽媽嘅專屬資訊平台.

首先問下大家，你地會點比小朋友食雞蛋？剝好哂永遠只係比佢見到‘白色’的蛋肉，定係好似我地咁全隻上？ 

其實我地一開始都是由成人幫忙剝好雞蛋殼先比孖寶食，不過早幾個月開始，我地就放手比孖寶自己自己嘗試剝雞蛋殼。

我無諗過第一次，幫小小就已經可以順利自己剝到雞蛋殼了，而且佢地亦都好喜歡呢個活動，仲會幫我剝埋我個隻。

其實呢個小活動係對小朋友的小肌肉發展有幫助的，憑良心講我作為一個孖寶御用的體適能教練係好注重呢一點的，呢個係屋企人人都可以做到的小活動，係可以訓練到小朋友嘅小手肌靈活度，大約18個月左右可以慢慢開始試下，當然過程中亦要教導同提醒小朋友雞蛋殼係要剝而唔可以食的，要細心觀察小朋友，最好可以在不介入太多的情況下幫助他們呀！

除咗小手肌之外，當然對認知亦有幫助啦，BBs可以知道煮好、未煮、仲有剝咗雞蛋殼之後嘅雞蛋係點，咁就教到小朋友係認知上啦！

小朋友之後剝咗雞蛋殼之後有得食，味覺亦應用上呀！

另外，我亦suggest大家可以用一個不綉鋼的容器，分別放一隻未恰，同已經恰熟的雞蛋,搖轉佢令兩隻雞蛋發出聲音，不過你要有心理準備有可能未恰的一隻雞眼會爛，所以有一個乾淨的器皿，爛咗都可以煎來食，講返咁玩有咩好，除咗視覺有應用到之外，其實另個活動對聽覺係有幫助呀！當然，同時對觸感亦可以有好的幫助啦！

呢個又簡單，又人人都可以做到的小活動，大家不妨同小朋友係屋企試下！

The post 統合Training道具免花錢，剝雞蛋訓練手部小肌肉 appeared first on MamaClub HK | 媽媽嘅專屬資訊平台.

這亦正正係孖媽想推介這個小遊戲比大家嘅原因，因為每個家庭都可以唔洗花金錢，簡單做到。當然作為修讀遊戲治療師嘅孖媽，亦絕對相信遊戲可以為孩子帶來不同程度嘅好處啦！

衣服夾遊戲大約26-30個月以上的小朋友就可以開始練習，當然係更早期嘅時候，孖媽已經有比佢地單純地把玩這個衣服夾啦，每個遊戲只要能力所及，唔同階段亦有不同好處。

衣服夾遊戲方法一：

大家可以先預備一個盒，小樽，比小朋友用栂指、食指、中指把衣服夾夾到小樽邊緣圍繞住。孖媽會配合語言說出，開、合，順便令小朋友明白開同合嘅意思。

呢個活動可以配合手眼協調之外，亦可以提升小朋友嘅專注力，同埋自信心。幫助小朋友認識日常生活嘅用品：衣服夾。當然係可以鍛鍊小朋友小手肌嘅精細度，為小朋友預備一雙寫字的手。

衣服夾遊戲方法二：

孖寶由好細個開始已經會用口數數，但真正認識數量的觀念係一定要識量化物件先可以算得上會。衣服夾遊戲當然亦可以幫助他們強化量化物件嘅概念啦。

我們可以先預備多一些衣服夾，同埋多幾個小樽，當我們講出4時，小朋友就需要把4個衣服夾夾到小樽邊緣上。如是者，重複其他數量。每次小朋友做到，佢地都會好開心架。

衣服夾遊戲方法三：

孖媽我會預備一些不同形紙卡，同埋係衣服夾亦貼上不同形狀的圖案。

遊戲會請小朋友把相對應的形狀嘅紙卡跟衣服夾夾埋一齊，呢個遊戲可以練習小朋友的邏輯概念、空間概念同埋強化小手肌嘅精油度喔！

呢個方法唔單止係用來衣服夾來夾野咁簡單，過程中小朋友亦會加深小朋友對顏色同形狀嘅認識。

最重要係可以提升小朋友玩專注力嘅一個小遊戲，小朋友係搵正正確形狀夾上衣服夾嘅過程中無形中可以訓練到小朋友嘅專注力。

小朋友要搵出正確形狀嘅卡同衣服夾，係可以提升小朋友對於正確專注對象的選擇性。同時亦可以訓練交替性專注力，小朋友需要通過觀察同判斷去完成遊戲。當然亦可以訓練小朋友持續性嘅專注力，因為小朋友要有耐心地去完成呢個遊戲，無形中提升咗小朋友持續性專注力嘅表現。

家長要留意嘅係小朋友可能會因為夾上衣服夾有困難而遇到挫折，但我們只要從旁給予鼓勵同適當嘅幫助，令小朋友可以慢慢自己做到，相信佢地自己可以係過程中得到滿足感。

最後家長亦可以給予小朋友一些衣服夾， 讓他們自由發揮，比小朋友自己創作有助他們夾出不一樣嘅想像力跟創造力！

呢個小遊戲咁多好處，簡單易做大家都可以係屋企做到，不妨試下呀！

The post ‘夾出專注力’ 衣服夾: 助孩子夾出不一樣嘅想像力跟創造力 同時亦可以強化小手肌　為小朋友預備一雙執筆的手 appeared first on MamaClub HK | 媽媽嘅專屬資訊平台.

除咗平時我地一家都會日日飲這杯紅紅的super healthy drink杞子汁來提昇身體, 增強抵抗力之外. 孖媽有時都會盡力煲返D靚湯比孖爸飲. 

今次就係新年優期, 煲咗個陰養顏, 禦寒又可以調理身體的靚湯比一家大細飲, 翅群角是鯊魚沒有翅針的部位,質感軟硬適中,營養和益處跟魚翅相似,因魚翅價錢較貴,煮食複習,一般家常便飯較為少用,而翅群角價錢便宜,煮食簡單,含豐富的蛋白質及膠元素,極具營養價值,中醫稱有補虛下氣功能,膠元素更有能令皮膚光滑,減少皺紋,常服更能常保青春.

花膠湯的主要食材是花膠，其實就是魚肚，是魚鰾的干製品，含有膠質。很多女士都喜歡飲花膠湯來滋陰養顏, 一齊睇下以下食譜:

花膠翅群角圓肉豬展湯

功效: 滋陰潤燥, 強骨保健, 振靜安神 滋陰養顏

材料:

紅蘿蔔 4條

花膠 適量 

翅群角 適量

栗子 1 磅

粟米 3大條 

螺頭  數個

蜜棗  2粒

圓肉 8-10粒

薑  3 片 (拍扁)

水 大約 2-3 公升

做法:

1. 所有材料洗淨、切件，備用

2. 瘦肉出水，讓其血水去掉，用冷水洗乾淨

3. 將翅群角加薑及鹽出水

4. 栗子去殼去衣, 洗淨; 備用

5. 將清水注入湯煲，水滾後放入所有材料，再滾。之後轉細火，煲1.5-2.5小時便夠火候

6. 如有需要放適量鹽調味，拌勻

而大家亦可以將湯渣取出放於碟上，以生抽伴食

新年當然唔止碟湯, 我仲煮定幾味等孖爸回家齊齊食餐好, 迎接Abundance Year!

祝大家新年快樂  心想事成  萬事如意！

The post 高蛋白質又低脂肪 滋陰養顏 禦寒同時調理身體的靚湯 appeared first on MamaClub HK | 媽媽嘅專屬資訊平台.

人生就像一場馬拉松, 或許女性曾經都會好執著年齡嘅秘密。而大家都忌諱年齡這話題, 大概係因為我們都被一些既定框框嘅所規範住，包括擇偶、生育、體力皮膚變差、經濟能力等問題。大家口中嘅三十歲，似乎都好似充滿危機。過了那條線如果仲未搵到人生方向、仲未有對象、未打算結婚、甚至未打算生小孩，彷彿就好似極大問題似的。因為20 幾歲嘅時候，大家都會仲當你係青春少女，然而一旦過了 30 歲，就好像再沒有「青春」兩字可言，似乎女人如果被這個期限追著跑，甚至可能變成莫名嘅惶恐。

其實年過三十，只有令我學會更坦然地擁抱自己，變得更加喜歡自己。

當年嘅我，印象中好像有站在鏡前，淡淡地回想一下過去30年嘅人生，心懷感激地告訴鏡中嘅自己：「我變得更加喜歡妳。」，雖然當時仍未結婚，亦未生小孩。但我還是會盡力地過好每一天，做自己喜歡做嘅事、嘗試自己有興趣嘅不同領域。

無錯歲月的確係帶比我們一些痕跡，但同時歲月亦帶走了我嘅稚氣同青澀，反而給予我們成熟與經驗，介符係30 – 40中間路上嘅我，慢慢累積到自己嘅能量，大抵上已嘗試過很多自己喜歡與不喜歡嘅事，開始有能力談一段成熟而穩定嘅感情，對比起20 歲，擁有了更多可貴嘅人脈與資產，與更加闊廣嘅人生。就算我已經再沒有世俗所定義嘅「青春」，我們女性還是要自信滿滿地跟自己說：「30歲 +，我變得更喜歡妳了。」

係呢個階段我嘅心境一直keep住沒有太大改變，當然最顯著嘅改變就係自己人生的順序現在已經完全upside down轉變了，現在凡事都以孖寶為先! 

但我亦深信只要你相信自己有能力做到一件事，無論你係30定60歲你都一定會做到。我認為擁有自己喜愛嘅事業同興趣，絕對係保持心境年輕嘅良藥。試想想，對事業有熱誠、有自己嘅興趣同夢想、不都是很吸引人嘅特質嗎?

30歲到50歲嘅我們，可以一起努力呀….

1. 平衡情緒，給自己陽光嘅心情

每天帶著陽光嘅心情，保持年輕同光彩，心態的確係好重要!

對我而言， 我喜歡面對小朋友，亦喜歡與人分享身邊一切美好嘅事物，所以我就成為了今天的我。當然喜歡大自然嘅我，適當地運用大地之母嘅恩賜，用精油這天然方法去提昇自己心靈，平衡情緒亦係好重要嘅渠道啦~

2. 我們都要以獨立嘅姿態綻放出自己

無論歲月如何變遷，都不要把錢視為生活嘅萬能，更不要為錢係男人面前卑躬屈膝，女人永遠係最美嘅風景，我們都一起以獨立的姿態綻放。

當自己有夢想就唔好再瞻前顧後，唔敢豁出去嘅話，做咩都未必會成功。

30歲嘅你可以成為一個有魅力嘅女性，而40歲嘅你更可以成為一個很有魅力嘅女性，因為我們都更了解真正嘅自己。

3. 持續學習，發展興趣

年齡沒有成為我持續學習嘅障礙，更沒有局限我嘅發展，相反這年齡嘅修行令更會把握每一次學習嘅機會。在近年考取成兒童遊戲治療師，修讀更多有關兒童心理學嘅課程，深入研究香薰治療嘅知識增進自己，考取成為嬰兒按摩及瑜伽指導師嘅資格，去幫助更多嘅人。

一路走來嘅人生如果說沒有失望同失落，是絕對沒有可能。但很感恩孖寶嘅出現，令我更會感謝同感恩一切。而進修更令我有很大的得著，可以把自己嘅興趣發展下去，持續學習，增值自己，保持年輕。

4. 讓日子過得雅緻，保持不老嘅心

學會調節心情，有時我們都真的要關顧一下自己嘅心情，因為一個人嘅情緒同健康都係息息相關，所以保持愉快嘅心境，愛護自己其實係好重要，慶幸自己認識天然療法，精油係平衡情緒上確實是幫了我一個很大的忙。

現在嘅我可以算得上是不卑不亢、愛丈夫、愛孩子、愛自己吧!

我們活著，不就是為了帶給別人快樂，同時亦給自己滿滿的快樂。

30歲+嘅女人，修練到一個階段，她們把美麗煉成自信，把年齡化為寬容，把時間凝為溫柔，把經歷寫成書本。時間和經歷甚至可以成為30歲以上女人驕傲嘅資本，係輕描淡寫中微笑應對一切，那份溫柔與從容，沒有歷練係不會學到的。

30有+嘅我們，都由愛自己做起，一起做個平淡，快樂嘅雅致女人!

30有+嘅我們，正是一個極富魅力嘅年齡。而眼下，請大家都一起享受著自己最美麗嘅狀態。

當我想到再過一段日子，便會到40歲了，四十而不惑，我相信到了40歲，更會是直正屬於自己人生嘅一個開始，期待我還是可以以自信、快樂，堅定地去應對生活。散發著屬於自己嘅魅力。願歷練讓我們更成熟，破除年齡設限，找到自己合適嘅節奏，快樂、優雅地走下去。敬女人!

The post 謝謝30+這年齡 讓我們都不再是青澀白紙 appeared first on MamaClub HK | 媽媽嘅專屬資訊平台.