這是好多人的第一反應。以上雖然唔係我本人湊B的組合，但係作為孖媽來說，我覺得一d都唔誇張。點解？一齊睇睇頭三個月的孖B生活啦…

初生孖B一天作息參考

飲奶、訓覺、大小便…每日呢個cycle 都會loop 六至八次，24小時不間斷。

初生BB，3個鐘頭要食一次奶，不分晝夜。跟據醫院母乳姑娘的講法 :「頭半個鐘BB食果d奶係水份黎架，要餵夠45分鐘先夠營養架。」仲未計BBs吮極都吮唔到的時間喎。

簡單d，舉個例子

0:00 – 0:45 換片+食奶 之後BB和媽媽訓覺（約2小時15分鐘）

3:00 – 3:45換片+食奶 之後BB和媽媽訓覺（約2小時15分鐘）

6:00 – 6:45換片+食奶 之後BB和媽媽訓覺（約2小時15分鐘）

如是者，就8個循環了，即一天了。

上面的時間表好似好合理，媽媽都有得訓覺。但係現實係殘酷的。以上的時間表只係孖媽的夢想only，2個BB真的會乖乖跟著一個時間表，一齊食奶、訓覺、不扭計嗎？

假設你的BB們錫住媽媽，會同一時間一齊食奶，俗稱「起雙飛」; 而且媽媽夠奶水，唔駛BBs食完再泵，仲有BBs好小喊，咁以上的夢想就可以實現了。否則，好多孖媽每日最多訓到斷斷續續加埋4至5個鐘，已經好好了。在初生頭幾個月，如果但一個BB黃，體重唔達標或者其他問題，仲要健康院醫院屋企週圍走添。

除左BBs要照顧，媽媽都要生存，都要食飯，仲要食好多餐來補充營養造奶比BBs添。咁邊個煮飯呢？其他家務，好似買餸、洗大人衫、手洗BB衫、洗奶樽、恰奶樽等，又點算呢？

以下分享下我個人的湊初生孖B的安排：

孖B家庭工作分為兩大類 — 日常家務 和 湊孖B工作

日常家務

(A) 買餸買日用品
(B)煮食
(C) 洗大人衫晾衫
(D)手洗BBs衫晾衫
(E)洗奶樽恰奶樽
(F)不斷煲水（媽媽同BBs沖涼、沖奶、幫BBs抺面抺patpat用）
(G)清潔家居（掃地抺地、倒垃圾、洗toilet等）

湊孖B工作

(1)換片
(2) 餵奶或泵奶
(3) 掃風
(4) 抺面嘴頸
(5) 沖涼
(6) 剪指甲
(7)其他: dum訓覺，嘔奶換衫換床單等

— 以上(1)至日(4)每日重覆6-8次

我的安排係……除左餵奶和泵奶［湊孖B工作(2)］，其它工作，放手吧！

交晒比婆婆、爸爸同工人。

媽媽不是鐡人，要有足夠的休息，身體才可復原，照顧BB們哦。

日常家務做唔切，可以從簡，譬如叫外賣或食個白飯就算。媽媽岩岩生完，又要餵奶，唔好比咁大壓力自己，做得幾多得幾多。若果，不幸地，四大長老同老公都幫唔到手，咁就係媽媽搭工人的配搭。記住一定要比工人足夠休息，如果唔係有咩意外就慘慘了。所以有d孖媽都會請兩個工人分日夜間番shift。知道有孖媽係自己1個湊B仲照顧埋自己，個人來說係深感佩服的，不過這又係第二個故事了。

回想起湊初生B的日子，真的係我人生最辛苦的時間，但在這一年多後的今天，每當我放工回家，就係我感到最幸福歡樂的時間！

The post 猜猜看：初生孖B要幾多人湊？ appeared first on MamaClub HK | 媽媽嘅專屬資訊平台.

分唔清樣貌

森林雖然係異卵雙生，但啱啱出世頭兩星期真係好似Copy and Paste一樣！孖媽我時常分唔清楚邊個已經食咗奶或換咗片，亦經常將佢哋放錯喺對方嘅床仔。後來公公婆婆買咗粒玉仔，佩戴喺腳上，就容易分啦！

飲食作息時間表

對孖媽嚟講，飲食作息嘅時間好重要。尤其係決心餵母乳嘅孖媽。初生至3個月時，如果兩個同時食同時瞓，3個鐘頭食一次奶，孖媽斷斷續續加埋可以瞓到4至5個鐘，已經好好了。但現實係孖B通常食奶節奏不一，或者當中總有一個會醒瞓啲…

父母可以連續瞓到3個鐘已經係個遙遠嘅夢想！我生完森林後半年，就好似斷片一樣，完全唔知道自己做過乜野，瞓唔夠係人生最痛苦嘅事情！後來，我無再堅持兩個一齊食人奶，長老們都會幫手夜晚餵奶，情況就開始改善咗！

出街困難症

好羨慕啲媽媽坐完月就可帶BB出街，老實講，我和森林爸二人盡全力，都要等到森林半歲之後，先帶到佢哋去第二個社區。

孖B每次出街都要準備好多野，奶粉、尿片、奶樽等全部乘二。如果預計出門時間超過3個鐘，即係等於兩餐食奶時間都在外，更要帶多兩倍嘅物件。森林更常喺我哋準備出門口時，輪流嘔奶、濕片；幫佢哋換好衫同片之後，又差唔多夠鐘食奶，無限循環，門口…有排都出唔到。

後來，我哋係出發前一半個鐘開始準備，寫一張清單作提醒，出門成功率就大大提高！

隔離飯香

點解孖媽通常都為孖B著一樣嘅服飾？森林愈大，我就愈明白… 雖然玩具衣服都係同款，但如果唔同顏色，就會俾佢哋感覺人哋身上嗰件係好啲。

同床瞓

就好似下圗咁，當森林3個月時，已經常常互相操練。孖媽一不留神，佢哋就好容易抓損對方。所以一直以嚟，瞓晏覺或瞓過夜，都係分床。

超大嘅活動空間

Playmate、High chair、食具、玩具等，所有野都要有2套！你懂的！而呢啲物件只會隨住孩子成長而增加。納米樓尺價飛升，孖B需要嘅活動空間卻愈來愈大；喺香港生多一個B，唔容易呀…

熱情擋都擋唔住

孖B有無心靈感應？我唔知道。但時常見到森林都係一齊喊一齊笑，佢哋情緒好容易互相感染，兩個鍾意抱埋一齊，望住佢哋嬉戲玩耍、熱情相擁，畫面當然超暖心。但前提係佢哋可以站穩同坐穩時，先咁熱情就更好了。撲嚟撲去，未識得控制力量，媽媽擔心你哋仲係弱弱嘅身子會受傷哦！

親子時間難分配

同補習興趣班一樣，單對單總好過一打二吧。

由森林2個月大開始，我每日都同佢哋一同睇書講故事；但8個月大之後，佢哋專注力大大降低，經常喺我講故事時被其他事物吸引而離開，最後孖媽變咗自己同自己講故事…單對單嘅親子時間或者佢哋就會專心啲，但爸媽就要另外再抽啲時間陪孖B啦！

【森林的童話】授權轉載 原文出處【新手孖媽的8大挑戰】

The post 邊個已食奶？雙生寶寶好似Copy and Paste分唔清！ appeared first on MamaClub HK | 媽媽嘅專屬資訊平台.

畢竟將來孭住800萬在身，洗費每分每毫都要想清楚，盡量想留多啲錢比森林。唔單止由經濟角度考慮，更要考慮生命的安全。然後好一段時間我都不斷在爬文，看看在政府同私家生的分別有幾大。最後，我選擇了在政府生，也慶幸生產過程順利，而且價錢實惠。如果你也是在「十五十六」的階段，希望我的經驗和所搜集到的資訊， 可有助你們的決定吧！

醫生技術經驗（適用於手術）

於政府醫院進行產檢，每次都是不同的醫生，甚至有時是實習醫生，要在生產時才會知道誰是你的主診醫生；私家醫院是可以指定醫生的，而且要有咁上下功力同經驗先做到私家醫生，所以手勢應該是好的。

不知屬於有幸還是不幸，因為孖Ｂ媽媽屬高危人士，所以在政府醫院生產，多數都有高級醫生在場；加上政府產房每日有如打仗一樣，奇難雜症應該見過不少了吧～當我生產時，也感受到政府醫務人員的專業同熟練，非常安心。

護士、助產士經驗（適用於順產）

如果是順產，助產士的角色分分鐘比醫生更重要。醫生不會長期待在產房，而陪伴你最長時間的一定是護士、助產士。一個有經驗的助產士可令你感覺痛苦的時刻較快過去，而且傷口也不用爆得那麼開。私家醫院的開刀情況較順產多，所以在這方面，政府反倒佔優，因政府鼓吹自然生產，政府護士做得多，自然經驗多，能駕輕就熟。

醫院配套設施

不是要求有五星級的房間，探病時間要極具彈性，而是產前產後的嬰兒配套儀器。很多私家醫院沒有初生嬰兒深切治療部(nicu)，而孖Ｂ多數早產，入加護病房的機會大，如出現複雜的情況都會轉交給政府。這也是我最大的考慮點，畢竟森林的安全最要緊！

探病時間

私家探病時間彈性，十多個小時；政府的通常是中午1小時，晚上2小時。以為生產完最想有家人及老公的照顧，但我個人經驗是，我更想無時無刻睡覺，因為太累了，剩半條人命…而且每3小時便要餵哺。私家醫院除非住單人房，否則會有很多人出出入入探病，不能完全放鬆地休息。

產後護理

政府有提供產後社康護士上門跟進媽媽傷口、康復情況、檢查寶寶臍帶、BB’s有沒有面黄、了解食奶大小便狀況等，1個月後到健康院用鴨嘴夾檢查。私家暫時沒有這種上門服務，但可於覆診時用超聲波照子宮。

收費

最後一項，對很多孖媽來說，也是最決定性的一項：錢！在私家生產預廿萬較穩妥，而政府數百元就能埋單。

總括來說，最重要還是大小平安，當然如果可以經濟又實惠就是錦上添花了。P.S. 從他人口中得知，可以到有私家服務的政府醫院，收費和舒適度，介乎私家與政府之間，又有NICU Support，不失為一個選擇！
【森林的童話】授權轉載 原文出處【【一次生兩個】孖媽去政府生，好嗎？】

The post 孖寶媽分享，在政府同私家生的分別有幾大？ appeared first on MamaClub HK | 媽媽嘅專屬資訊平台.