傑。斯與晴 – MamaClub HK | 媽媽嘅專屬資訊平台

久違了的Shopping Time @一田秋日BB展

傑。斯與晴 — Thu, 01 Oct 2020 16:23:13 +0000

年初時，好多展覽會係疫情之下都被迫取消或延期，就連BB展亦都唔例外，

只好期待大型百貨公司舉行嘅BB展。

幸好係二寶出世之前可以去到一田BB展，可以為自己準備入院用品及打點二寶嘅用品，唔係就可能要麻煩爸爸東奔西撲去買啦。

轉眼間，二寶已經三個多月人仔啦，又係時間開始睇定加固嘅用品及餐具啦。

前幾日收到一田寄來嘅會訊，知道有 #一田秋日BB展，所以我就捉咗JM爸一齊來陪我哋行街Shopping！

YATA Fans 會員尊享優惠

申請成為YATA-Fans 手機App會員，可以尊享優惠購買限定割引嘅指定產品架。

單次購買BB產品滿$500更可享有3X積分添架！

YATA-Fans限定割引優惠嘅指定產品種類都唔少，上至BB護理用品，下至濕紙巾、餐具及茶點等都一應俱全。

而家購買嬰兒產品物滿$3,000仲可以免費升級成為一田BB會會員，尊享BB會會員購物優惠！

你都一齊做個精明慳家嘅準爸媽啦！

事不宜遲，即刻睇下將軍澳東港城中庭一田特賣場有咩正嘢啦！

限定割引好物推介

JcoNAT原生除菌液(250ml) HKD$66

K’s Kids發聲動物配對方塊 HKD$99

MUNCHKIN嬰兒軟匙(3件裝) HKD$29

Tommee Tippee雙耳防漏杯(150ml) HKD$20

西村幼兒三色小饅頭 HKD$19.9

順順兒頂級黃金版嬰兒濕紙巾(每箱20包) HKD$239

除咗以上嘅限定割引優惠之外，JM媽亦係場內發掘咗好多唔同嘅抵買好物！

小JM媽推介好物

嬰幼兒用品

BB威寶嬰兒衣物濃縮洗劑優惠套裝 HKD$129 (送奶瓶及蔬果濃縮洗劑)

Arau Baby系列 HKD$108

HUGGIES皇牌天然加厚配方嬰兒濕紙巾補充裝(184片) HKD$109/3包

Calibowl專利防漏防滑幼兒學習碗* HKD$72.1

Philip AVENT奶瓶加熱器(Premium)連初生嬰兒奶瓶套裝* HKD$699

Fisher-Price兩用音樂學習噓噓樂* HKD$197.9

卡通摺疊浴盤 HKD$369

BB威寶消毒搓手泡泡 HKD$38~65

NUK系列

Tommee Tippee系列用品

各式嬰兒尿片及褲仔

嬰幼兒外出用品

GB Gold Pockit+手推車附收納袋及揹帶 HKD$1,890

順順兒高級無香嬰兒濕紙巾 (只限同款)* 買二送一

Richell 全線正價產品 8折*

嬰幼兒食品及飲品

貝貝幼兒專用調味醬油 HKD$89/2枝

各款西村小饅頭 HKD$16.5~25.5

貝貝威化餅 HKD$100/3盒

和光堂嬰兒淡味蘋果水/麥茶 HKD$35/2條

HT系列嬰兒食品

嬰幼兒服飾及床品

Cherry角落小夥伴12件嬰兒床品套裝 HKD$499

可加HKD$100-換購BB薄被芯

Cherry角落小夥伴BB冷氣被 HKD$239

嬰兒透氣乳膠枕 HKD$190

準媽媽用品

NUK超乾爽即棄哺乳墊* HKD$72/2盒 (送嬰兒棉柔巾(10片)一包)

薑心比心純薑坐月護理套裝* HKD$399

*YATA-Fans可享額外95折優惠

一田秋日BB展

日期：

由即日起至2020年10月15日

地點：

一田百貨（沙田/大埔/荃灣）

一田超市（屯門/觀塘/將軍澳）

特別展場（荃灣廣場中庭及長廊/將軍澳東港城中庭）

The post 久違了的Shopping Time @一田秋日BB展 appeared first on MamaClub HK | 媽媽嘅專屬資訊平台.

【我們Hea的家】二寶媽的好拍檔

傑。斯與晴 — Mon, 21 Sep 2020 09:40:21 +0000

老實說，無人天生就識點樣湊BB，我亦都唔例外，我都係一位長期P牌媽媽，能夠做到嘅就係每日陪著小屁孩成長，一起學習、相處、溝通，從而互相了解。

結婚生B之後，最常聽到嘅就係身邊朋友埋怨另一半，話老公唔幫忙、唔體諒、唔理解之類。

當被反問：你有無同老公講要幫忙？有無教佢點做？

往往得到嘅答覆會係：無啦！佢都掛住打機，點叫？點教？

之但係，你唔講人地又點知道你需要幫忙呢？係咪？

不如試下放手俾個機會爸爸學下點做，俾個機會自己鬆一鬆。

當初小JM出世後，係JM爸嘅一句說話教識我要放手，

JM爸：「要幫手記得出聲，唔好自己一個死頂！」

就係因為咁，我學會咗係適當嘅時候放手，俾JM爸嘗試去做及幫手。

俾爸爸多參與湊B嘅日常事務，可以令爸爸了解湊B嘅真實感受。

同時亦可以俾機會爸爸從最初階慢慢開始學習當「奶爸」，譬如換尿片、餵奶、掃風之類。

而媽媽就可以從旁提點、協助，等爸爸們可以安心嘗試、體驗當「奶爸」。

JM爸外表雖然粗獷，但其實佢湊B都唔差，係二寶出世後JM爸比以前更主動幫手，大概係因為有咗湊B嘅經驗所以熟手咗。今次唔駛提點，JM爸都已經識自動波去為二寶打點一切添。

以前行街會睇小JM嘅嘢多，但有咗二寶之後，JM爸出街都留意多咗BB用品。

JM爸仲係二寶出世之前搜羅咗好幾款奶樽，諗住俾二寶到時試咁話。

雖則話唔同品牌有唔同好處，但最重要嘅考慮因素就緊係想減少二寶出現腹絞痛、嘔奶和打嗝嘅情況。

以前用樽餵小JM飲奶都總係會出現嘔奶及哭鬧情況，有時扭到直頭唔願飲，結果要買好多款唔同嘅防脹氣奶樽來試，幾經辛苦先搵到啱小JM用嘅品牌。

而今次JM爸發現咗性價比高嘅 AVENT Anti-colic嬰兒奶樽，呢款奶樽特別設有防絞痛活門，可以減少餵奶時樽內出現真空嘅情況，更可以將多餘嘅空氣排到樽底阻止空氣進入BB嘅肚，咁就可以減少BB肚仔痛。完全切合我地所需，真係要俾個讚JM爸！

JM爸話佢揀BB用品嘅時候特登揀國際品牌，貪佢有信心保證，用都用得安心D。

市面上有多款嬰兒防漲氣奶樽，而JM爸揀嘅AVENT奶樽就可以配埋AirFree Vent排氣裝置使用，二寶係飲奶時可以將佢環抱坐直，唔係瞓低飲奶，奶樽水平放，奶樽咀都滿晒奶，咁就可以避免二寶係飲奶時吸入空氣，有效減少腹絞痛、嘔奶和打嗝現象架！

^即刻睇下JM爸同二寶嘅示範啦！

用咗呢款奶樽後，二寶明顯地無咁容易有肚風及肚痛，而嘔奶嘅情況亦都有改善。

二寶就自然食得開心訓得舒服啦！

The post 【我們Hea的家】二寶媽的好拍檔 appeared first on MamaClub HK | 媽媽嘅專屬資訊平台.

神隊友恩物。簡便易用暖奶好幫手

傑。斯與晴 — Tue, 18 Aug 2020 07:30:16 +0000

之前提及我有泵奶俾二寶飲及作為儲備之用，咁自不然亦需要暖奶，之但係要揀好嘅暖奶器亦唔容易，因為暖奶過熱就會破壞母乳當中嘅營養架啦！

第一胎時買咗個暖奶器諗住方便長輩及工人姐姐用，點知長輩嫌太麻煩無用，就咁用熱水座熱樽奶；而老公同工人姐姐就覺得複雜，每次暖奶可能因為份量唔一樣，所需時間都唔同，好難捉摸。

有見及此，今次揀暖奶器除咗會睇牌子之外，仲會重點睇暖奶器操作嘅簡易度，方便神隊友及長輩使用。當然亦著重暖奶器加熱嘅部份啦，如果過熱就會浪費左媽媽嘅心血。

剛好俾我遇上Philips AVENT新出嘅暖奶器，不單符合晒我以上所想所需，而且一部機有齊晒暖奶模式同加熱嬰兒食品功能，外型仲好簡潔靚仔，唔駛多考慮就將佢帶咗返屋企啦！

返到屋企我仲第一時間同隊友分享呢暖奶器，連隊友都話好易上手，暖奶無難度咁話！

^一眼就睇清晒點用，夠晒簡潔易用

其實使用方法好簡單，只需要幾個簡單步驟就可以做到暖奶或加熱嬰兒食品。

加熱母乳：

當要暖奶嘅時候，只需要轉到相應嘅奶量標示按start，3分鐘就可以將母乳加熱至接近人體溫度。加熱完成之後仲可以保溫60分鐘，所以預早少少暖奶都唔駛怕攤凍哂。

加熱嬰兒食品：

只需要將按鈕轉動至加熱嬰兒食品標誌即可進行加熱。

小提示：

若母乳或嬰兒食品已經冷藏的話，暖奶器亦會先行解凍再加熱至合適嘅溫度架。

而家有咗呢部暖奶器我就可以安心休息下，俾隊友同二寶多啲親子時間兼且分擔一下餵奶工作。

The post 神隊友恩物。簡便易用暖奶好幫手 appeared first on MamaClub HK | 媽媽嘅專屬資訊平台.

【我們HEA的家】五款孕期簡易家常湯水推介

傑。斯與晴 — Thu, 06 Aug 2020 08:34:23 +0000

今次陀二寶雖然胃口比陀小JM時好，但因為體重唔達標，又試過孕中期有輕微出血及腰痛，所以孕期嘅不同階段都有煲湯俾自己及家人飲，一齊滋潤下補一補！

＊以下湯水係我孕期都有飲開嘅，但每人體質有不同，所以飲之前有需要的話可以向醫生了解咗先＊

【安胎之選】

杜仲續斷巴戟湯

孕中期腰痛總係難免，係時候要補腰補肝腎先得啦！

杜仲續斷巴戟湯除咗補補肝腎之外，亦有安胎之效，不過就係苦啲咁囉。

杜仲: 有補肝腎、安胎之效

巴戟: 強健筋骨

續斷: 同樣有助補肝腎

黑豆: 美髮保髮之選

材料：

杜仲、巴戟、續斷、黑豆、豬骨、生薑、黑棗

講到安胎，其實桑寄生蓮子蛋茶都好正架，滋潤安神之餘又益肝腎，

以前做女時有經痛，媽咪都會煲俾我飲。

粟米栗子淮山瘦肉湯

呢款湯四季皆宜，不單止啱晒一家老少，就連孕媽都一樣啱飲。

特別適合脾胃虛弱、腹瀉、腎虛腰痛、夜尿頻嘅人仕飲用添架。

栗子: 又被稱為腎之果，含豐富葉酸，啱晒孕媽媽

淮山: 健脾益胃，補氣血兼補腰腎

材料：

粟米、栗子、淮山、紅棗、瘦肉/豬腱

【孕後期】

孕後期開始訓得有啲差，一晚醒幾次，攪到個人又好攰，有時仲有少少暈添。

係時候煲返啲安神舒壓湯水幫助入眠，同時要繼續好好補充鈣質、鐵質等多種營養，為日後嘅母乳路做好建設!。

花膠螺頭舒壓安眠湯

螺頭：滋陰補腎、清熱去濕

淮山：補脾腎、改善頭暈及改善血氣虛弱

杞子、圓肉：有助改善睡眠質素

材料：

急凍響螺頭、花膠、淮山、圓肉、杞子、豬腱

蓮藕章魚黑豆湯

蓮藕章魚黑豆湯不單含豐富營養，仲有補血養顏之效，而且對預防骨質疏鬆亦好有幫助。

母乳媽媽飲仲有助泌乳，可幫助催乳及上奶添。

材料：

章魚、蓮藕、黑豆、去核紅棗、瘦肉/豬腱、生薑

蓮藕花生排骨湯

孕後期都啱飲，而且不寒不燥，一家大細都可以一齊飲。

最重要係有助補血，同時亦健脾益胃。

母乳媽媽飲咗仲有助催乳添架，可以話係一舉幾得之選。

材料：

蓮藕、花生、排骨、紫花果

The post 【我們HEA的家】五款孕期簡易家常湯水推介 appeared first on MamaClub HK | 媽媽嘅專屬資訊平台.

【我們HEA的家】安撫神器。Ultra Air 夜光安撫奶嘴

傑。斯與晴 — Thu, 23 Jul 2020 10:42:39 +0000

早前二寶滿月，我地就按針卡嘅日子帶咗二寶返健康院打針。

唔知係咪嚇親嘅關係，二寶由打完針果日開始就訓得好差，仲會突然扎醒繼而爆喊，成日都好似好不安咁。

作為媽媽嘅都好明白初生BB係比較容易喊，所以我地亦盡量抱下同拍下二寶從而安撫佢嘅情緒，希望俾佢多啲安全感。

但無奈地，二寶有時真係扭足全晚，半夜餵完奶要伏喺我胸前先訓得到，所以我同爸爸兩個都唔夠休息，成日都好攰。

為咗可以快速咁安撫到二寶而唔影響大家嘅睡眠質素，我決定出動到安撫神器 – 奶嘴！

我揀BB產品都會考慮大牌子，因為會有安全品質保證，咁就唔洗擔心產品用嘅物料會影響BB健康。加上奶嘴係BB嘅貼身用品，就更加要小心D去揀選！雖然價錢可能會貴少少，不過最緊要係用得安心！

我揀左 AVENT最新嘅Ultra Air 夜光安撫奶嘴俾二寶，奶嘴有4 個特大氣孔，可以促進空氣流動，保持BB嘅皮膚透氣乾爽，佢哋嘅奶嘴係專為自然口腔發育而設計，咁就唔驚BB上腭、牙齒同牙床嘅發育受影響啦！

佢仲有夜光功能，半夜二寶喊時我都可以第一時間搵到奶嘴而唔駛盲摸摸咁搵或者開燈搵咁麻煩！

另外Ultra Air 安撫奶嘴有埋奶嘴盒，帶出街用都方便，用完放番入個盒度。希望依個唔用奶嘴蓋嘅方法可以令二寶唔會過份倚賴奶嘴啦，因為依家一用完就好自然咁將個安撫神器收埋落袋，唔再係隨身掛住係二寶件衫上面，亦唔會一見二寶喊就即刻塞個奶嘴俾佢，反而多咗抱下氹下佢！

如果有微波爐，個奶嘴盒仲可以連奶嘴一齊直接放入微波爐消毒。只需要加入清水，再加熱3分鐘就完成整個消毒程序架啦，既簡單又衛生！

有咗呢款安撫神器，二寶就可以輕鬆入睡，即使半夜扭計都無有怕！

The post 【我們HEA的家】安撫神器。Ultra Air 夜光安撫奶嘴 appeared first on MamaClub HK | 媽媽嘅專屬資訊平台.

媽媽唔易做。母乳路的好伙伴

傑。斯與晴 — Fri, 03 Jul 2020 01:00:30 +0000

二寶終於出世啦！

雖然比預期早咗差啲變早產B，幸好一切都安然過渡，總算有驚無險。

上胎成功母乳餵哺小JM 至3歲幾，所以今次我亦都決定繼續餵母乳。

有咗上胎嘅經驗，今次自然更加得心應手！一早買定奶泵傍身，咁就可以請爸爸幫忙餵二寶，爭取更多時間休息，另外都想分多啲時間陪小JM或做家務之類，實行分工合作，咁就更加事半功倍啦！

講起餵母乳，上胎的確好多嘢都唔識，結果買咗部體積較大嘅家用機。

係屋企用固之然無問題，但講到拎返工就真係幾重，拎多幾次連膊頭都緊晒。

之後貪平買咗部細機返工粗用，但係力度過強，結果扯到乳房都痛，真係得不償失。

有咗上次嘅辛酸經歷，今次揀奶泵亦比較謹慎小心，畢竟奶泵都係母乳媽媽會經常使用到嘅貼身用品嘛！唔同品牌都有唔同好處，功能同舒適程度固之然係最重要嘅考慮因素，而今次我就揀咗體貼媽媽需要嘅Philips AVENT電動同手動奶泵作為我嘅母乳拍檔！

^好喜歡佢嘅簡約設計及色調，俾到人一種好柔和舒服嘅感覺。

唔試過真係唔知邊款好，用完Philips AVENT電動同手動奶泵俾我嘅感覺就係－舒服！佢地嘅貼心設計令我唔洗為咗遷就個奶泵而身體向前傾，泵奶時只需要放鬆咁直坐就可以確保母乳流入奶樽內，唔怕漏出喇叭，個設計完全係以媽媽嘅需要出發，真係幫到手！泵一次奶都要十幾二十分鐘，如果要彎住腰咁長時間都唔好話唔辛苦，久而久之仲會出現腰酸背痛嘅情況！如果有得揀就梗係揀個可以令你可以舒舒服服泵奶嘅奶泵啦！

另外佢地嘅喇叭設計亦有別於一般奶泵，花瓣式設計嘅按摩軟墊，只要係泵奶前啟動按摩功能就有助刺激母乳分泌，就好似BB吸吮乳房嘅動作，咁樣就自然更加容易出奶啦！

^設有按摩功能及三重力度選擇，選擇啱自己嘅力度就唔怕會整痛乳房。

俾個小貼士新手媽媽，揀奶泵嘅時候除咗要睇功能同舒適度之外，我通常都會選擇大牌子，品質自然會有保證，唔駛擔心好似之前咁買咗平嘢又唔敢用啲Parts啦。

係二寶出生初期時，我亦有用上手動奶泵以幫助擠奶以減輕胸部負擔。因為初生BB胃口比較細，二寶食完一邊就已經飽到想訓，結果另一邊胸太谷，需要用手動奶泵幫手，免得乳腺太谷造成發炎。手動奶泵設計小巧輕型，方便攜帶及存放，而且仲可以按個人需要調節力道而擠奶。奶量未係好多同未適應到電泵力度嘅媽媽可以用手泵協助泵奶先，等自己身體慢慢適應泵奶嘅感覺。

母乳媽媽嘅好伙伴除咗有奶泵之外，其實又點少得母乳儲存袋呢？

一個好嘅母乳儲存袋除咗品質用料好唔怕漏之餘，

最好有安全防漏雙拉鏈封口，咁就可以確保安全同衛生啦！

奶袋頂部設有書寫位置，一來唔怕筆嘅墨水滲入奶袋影響到母乳嘅質量，二來你一包包放係雪櫃嘅時候可以好方便咁睇到每一包奶嘅資料，正！

^新式儲奶蓋，可隨意轉換成奶咀即可餵哺。

作為一個二寶媽，好清楚明白到｢要爭取每一個對自己好嘅機會｣嘅道理，因為你嘅生活已經多咗一個生命你要去照顧，無論係每日30分鐘嘅ME TIME定一件又一件幫到手嘅小工具，記得把握係日常生活上令自己可以減輕負擔，放輕鬆嘅機會，因為媽媽的確唔易做！

The post 媽媽唔易做。母乳路的好伙伴 appeared first on MamaClub HK | 媽媽嘅專屬資訊平台.

小JM料理台。簡易下午茶。迷你酥皮檸檬撻

傑。斯與晴 — Sat, 28 Mar 2020 10:00:39 +0000

疫情未退就唯有係屋企搵嘢玩

既然閒賦在家，最啱就係同小主一齊整甜品，實行以 #正能量對抗疫症！

從飲食著手增強勉疫力以對抗惡菌！

小JM最鍾意食果撻，今次我地就整 檸檬酥皮撻 來對抗疫症啦。

一顆小小嘅檸檬就已經含有豐富嘅維他命，絕對係增強勉疫力之選！

今次都遇到有個難題，就係行咗好幾間鋪都買唔到酥皮呀！

不過呢少少野係唔會難到媽媽嘅，我已經諗好兩個方法：

1.) 自己搓皮

2.) 用印度餅皮

結果又好好彩俾我地買到印度餅皮，媽媽我又可以懶下啦～

材料:

印度餅皮

雞蛋三隻

檸檬兩個 (用作整檸檬皮及檸檬汁)

糖 40g

無鹽牛油 40g

水 15ml

做法:

1.) 先將檸檬洗淨，再將檸檬皮磨出，備用。

小提示：

記住只要黃色檸檬皮，白色部份會澀喔！

2.) 將已磨皮嘅檸檬柞汁，預留40ml檸檬汁備用。

3.) 預備三隻雞蛋，備用。

4.) 將檸檬皮、糖、水及檸檬汁加入蛋中，並攪勻備用。

5.) 蛋液稍為打勻後，隔水以細火加熱，並持續攪伴。

6.) 將蛋液加熱需要持續攪伴，待蛋液稍為凝固即可取出。

7.) 將無鹽牛油加入至剛加熱好嘅蛋液中，並攪伴至牛油完全融化。

　待蛋液冷卻後就可以加入蛋撻中。

8.) 取出印度餅皮，並以模具CUT出形狀。

9.) 將印度餅皮放入錫紙兜中，慢慢按壓至完全覆蓋。

　焗之前記得要係餅皮桔小孔喔!

10.) 將已桔小孔嘅餅皮放入AF，以180度焗10分鐘，即可取出再加入檸檬蛋液。

　　加好蛋液再焗 5分鐘即成。

^酥皮波波檸檬撻及迷你檸檬撻

^一出爐呢個人仔就已經快手KO咗4個啦！

^親子迷你酥皮檸檬撻製作成功! ^_^V

如果你都好似小JM爸一樣唔好甜品，但又想增強抵抗力的話，就可以選擇有55年歷史，而且日本製嘅「#奧樂蜜C」。

一枝「奧樂蜜C」就含有相等於 11個檸檬嘅維他命C，而且仲可以一次過滿足晒一日維他命C＋B嘅所需添架！

銷售點：

惠康超級市場、百佳超級市場、一田超級市場、AEON超級市場、Don Don Donki、OK便利店、7-11便利店、Vango便利店、HKTV Mall

The post 小JM料理台。簡易下午茶。迷你酥皮檸檬撻 appeared first on MamaClub HK | 媽媽嘅專屬資訊平台.

【小JM料理台】簡易黑糖小蛋糕

傑。斯與晴 — Sat, 29 Feb 2020 15:39:05 +0000

漫長嘅停課之路踏入第四星期

阿媽俾小主玩到有氣無得抖。

對住電力寶寶小JM，我呢個孕媽都要退避三舍。

為咗可以俾小主有啲勢毅，決定一齊整下蛋糕仔。

小主指定小食 – 黑糖薑小蛋糕

簡單易整，用AF焗十分鐘就有得食，仲要外脆內軟。

轉眼間呢個為食豬就已經清晒碟添。

自己tea自己整，無嘢做搵嘢來攪真係可以消磨到時間。

屋企勝在有廚師機可以玩下，都叫做多一個親子活動。

黑糖薑小蛋糕

材料：

雞蛋三隻

豆奶 150ml

黑糖薑粉 120g

吉士粉 30g

梳打粉 5g

低筋麵粉 200g

無鹽牛油 30ml

做法：

1.) 將低筋麵粉用篩慢慢篩好備用

2.) 要將梳打粉、吉士粉及黑糖薑粉篩入廚師機中，攪勻備用

3.) 將無鹽牛油預先加熱座溶，備用

4.) 將蛋加入已攪勻嘅粉中

5.) 再將豆奶及牛油加入

6.) 以廚師機將材料攪勻備用

7.) 最後將粉漿倒入蛋糕仔模具，再以180度AF焗10分鐘即成

以AF烘焗小蛋糕其實都好方便，亦唔怕小JM會多手整到。

小蛋糕焗完可以有外脆內軟嘅感覺，好岩小朋友食。

The post 【小JM料理台】簡易黑糖小蛋糕 appeared first on MamaClub HK | 媽媽嘅專屬資訊平台.

小JM料理台。自家製。黃金蕃薯造型麵包

傑。斯與晴 — Sun, 27 Oct 2019 05:25:14 +0000

早前入手咗廚師機，於是小JM媽我開始埋首學習整麵包，希望可以得到小主垂青。

某日放假唔知做咩好?

於是乎就諗住問下小JM，等佢可以俾啲提議我。。。誰知小主竟然想學整麵包。

小JM仲要指明係整兔兔紫薯包添喎

不過，好可惜搵咗幾個地方都搵唔到紫薯，所以我就提議不如改用日本黃金蕃薯整兔兔包。

整好兔兔包之後，小JM見到新鮮出爐嘅兔兔包時，竟然毫不猶豫咁一口咬落兔兔度

真係嚇到為娘吃手手！小主，你太殘忍了吧！

同小朋友整麵包不單可以培養及促進親子互動，仲可俾小朋友訓練到小手嘅大小肌添，而且小朋友自己有份整，自然就食得更加多添啦，真係一舉數得！

日本黃金蕃薯兔兔包

麵包材料：

低筋麵粉 250g

速發酵母 2-4g

無鹽牛油 25g

砂糖 20g

鮮奶 120ml

餡料材料：

日本黃金蕃薯 2條

鮮奶 40ml

餡料做法：

1.) 先將日本黃金蕃薯洗淨再蒸熟並去皮，備用

2.) 將鮮奶加入日本黃金蕃薯中，並以叉將蕃薯壓成蓉，留有粗粒亦可喔！

麵包做法：

1.) 先將低筋麵粉、砂糖、速發酵母、鮮奶放入攪拌碗中

2.) 將攪拌碗鎖緊於廚師機，以麵團鉤用速度1慢慢攪拌

3.) 倒入室溫無鹽牛油繼續攪伴，直至麵團均勻成球狀即可。

^發酵完大咗成倍有多呀！

4.) 於碗內塗少少食用油，並將麵團放入，及以保鮮紙覆蓋，待發酵完成即可。

5.) 將已完成發酵嘅麵團取出，並用手壓下去將空氣擠出，即可

6.) 將麵團平均分成八等份

7.) 先將麵團搓成一個個小圓球

8.) 將小麵團壓扁，並將黃金蕃薯餡料釀入其中。

9.) 完成後將麵團搓好，以包裹餡料。再為小麵團以芝麻作眼晴。

10.) 貼好眼睛後，可於麵團後方加添尾巴

11.) 最後，以較剪為麵團整兔耳，以成小兔造型

要小心剪喔，唔好太大或過小，都會影響烤焗嘅結果喔～

12.) 將焗爐預熱至180度，並將小兔排好，以準備入爐！

13.) 將小兔麵團焗15~20分鐘即成

^表面成金黃即係OK架啦!

^用手撕開一半，隨即傳來蕃薯香。

^小兔麵包出爐喔!

^為食小JM搶先試食！

^早餐都有著落啦！

The post 小JM料理台。自家製。黃金蕃薯造型麵包 appeared first on MamaClub HK | 媽媽嘅專屬資訊平台.

小JM料理台。趣緻糕點。南瓜紫薯糕

傑。斯與晴 — Thu, 15 Aug 2019 03:54:49 +0000

從前，我係一個懶得搓粉團整糕點嘅懶媽媽，

但自從入手咗美的嘅多功能食物料理廚師機之後，得終於肯踏出我嘅第一步！

為小JM整咗人生第一次嘅糕點啦！

小JM係個為食寶寶，講到食特別醒！

一問小JM想食咩糕點時，點知小JM話要食南瓜同紫薯，真係俾小JM考起。

為咗唔令小JM失望，我決定將南瓜糕改做紫著餡料，變成可愛又得意嘅南瓜紫薯糕！

材料：

皮：

小南瓜　一個（約300g)

糯米粉　200g

糖　　　30g

餡料：

紫薯　　160g

牛奶　　30g

糖　　　15g

枸杞　　小量

做法：

1.)　先將紫薯去皮、南瓜去皮及去籽，再切成小件，備用。

2.)　將已切件嘅南瓜及紫薯蒸熟。

3.)　將蒸熟咗紫薯加入牛奶及糖再壓成蓉。

　　完成後，將紫薯蓉以保鮮紫包好再放入雪櫃冷藏，備用。

4.)　將蒸熟咗嘅南瓜加入糖及糯米粉，並用廚師機攪拌成麵團。

　　美的機，只需開2度慢慢攪拌，待麵團變成光滑即成。

5.)　取出南瓜麵團後，可將麵團分成20小份，備用。

小提示：

如果擔心南瓜麵團會黏手的話，不妨便用手粉或搓粉前沾上少少糯米粉。

6.)　將紫薯蓉取出，並切成小件，備用。

7.)　將南瓜小麵團用手搓圓後再壓扁成圓形，並將紫薯蓉放入，再包好搓圓。

8.)　輕力將南瓜紫薯糕稍微按扁少少，再以刀背或牙簽壓出南瓜造型。

9.)　將杞子加於頂部，成為南瓜紫薯糕嘅梗即成。

10.)　最後將南瓜紫薯糕蒸熟即告完成。

今次我一反傳統，用咗兩個唔同嘅方法去加熱及蒸煮，發現來口感原來都有少少差別。

1.)　用氣炸140度5-6分鐘，再蒸5分鐘

2.)　蒸10分鐘即成

就兩種方法而言，蒸完好似痴口一啲；而氣炸完再蒸感覺較好，煙韌得來唔黏牙。

The post 小JM料理台。趣緻糕點。南瓜紫薯糕 appeared first on MamaClub HK | 媽媽嘅專屬資訊平台.