駐站作家

【喬喬妹妹養育記0M】親身分享二胎繼續上奶攻略!

想餵人奶既媽咪未生b前肯定都超擔心自己可唔可以成功上奶,當然我都唔例外,以下同大家分享我兩胎餵母乳既經歷同上奶經驗比大家,希望各位媽咪母乳之路都可以行得順利!!

第一胎大仔皓皓出世後,佢一連六日去咗新生兒病房,當時我無埋身,不過我擔心咩都唔做,等佢返屋企我都過咗黃金上奶期,所以我出院第三日係屋企嘗試按摩試吓有無母乳,最後當然好開心慢慢開始有,之後等BB返嚟,再調整餵哺姿勢就好順利埋身餵,期間都經過想放棄,不過一直堅持到第二十六個月停工,二十六個月時間唔長唔短,不過我都好開心自己能夠堅持到!

而第二胎我繼續選擇餵母乳,加上有上胎經驗所以可以同大家講吓有咩係上奶必食食物同習慣要做好,令自己盡快上奶!

充足水份攝取!每日都要有充足水份吸收,我每日會飲四五千ML水,再加上唔飲都會好口渴,所以我都會不停飲!

充足湯水!湯水除咗份量岩,仲要飲得岩!我每日都會飲兩大碗湯,媽咪通常會煲魚湯或者章魚湯,另外建議大家落花生一齊煲,我上網爬過文,花生能夠幫助上奶,所以煲完我都會食埋嫁,以下分享的幾款坐月湯水都可以落花生一齊煲。

坐月湯水分享:

上奶湯水 – 木瓜魚尾花生湯

平補素湯 – 淮山栗子素湯

平補素湯 – 無花果雪耳潤肝腎湯

平補湯水 – 豐富蛋白質 & 補腦!紅腰豆腰果合桃瘦肉湯

牛奶/豆奶補充!好多媽咪都會飲奶去補充返營養,上胎我無飲,不過今胎見有媽咪講開,所以我會無添加糖豆奶,一來幫助上奶,二來幫助產後傷口修復,三來增加蛋白質,等BB透過母乳增加肌肉發展!

白飯!餵母乳既媽咪十個有九個餐餐都一大碗白飯咁食,當然對上奶有幫助,不過我發覺咁食真係令自己肥過未生前,所以今胎會加其他米混合食,好似紅米或者燕麥飯咁,順便增加膳食纖維!

足夠休息!訓得多休息得好,身體造奶都會多,初期餵人奶階段,能夠順利上奶係好緊要,所以初期要抖多啲,等身體更易上奶!

埋身餵!好多媽咪會話埋身唔知餵咗幾多,同埋驚佢食唔飽。不過埋身餵會令身體更易出奶,同埋我發覺埋身餵,乳柱明顯會更多,加上埋身有利身體按嬰兒需要調節造奶量,咁身體唔會造多咗奶而造成負擔,所以情況許可埋身餵係最好嫁!

 

孕婦湯水分享:

益肺止咳 – 淮山豬展湯

潤肺潤喉 – 蘋果雪梨雪耳潤肺湯

健脾益氣、潤肺 – 北芪黨蔘豬展湯

提升免疫力、補益肝腎!蟲草花雪耳素湯

 

——————————–

唔好錯過我哋親子育兒同每週食譜分享!

快啲like及搶先看我哋專頁!Kylife與二寶之日常

快啲加入懶人食譜Group,齊齊分享!shorturl.at/alLM0

記得追蹤埋我哋IG呀!kylife.babies

———————————-

Tags

kylife

追蹤我們的親子及食譜分享! 兩兄妹加小肥貓的日常點滴! Fanpage: https://www.facebook.com/kylifemitty/ IG: https://www.instagram.com/kylife.babies/

發佈留言

發佈留言必須填寫的電子郵件地址不會公開。 必填欄位標示為 *

Back to top button
Close