好多媽媽都會猶疑，應唔應該俾奶咀BB食?
因為好多人話食得多奶咀口部發展，出牙會有問題，而且怕好難大個戒奶咀……
但確實食奶咀能夠安撫寶寶情緒，能夠令佢地可以容易入睡…..
我自己認為，食奶咀亦滿足到BB係某段時間成長上口肌發展的需要。
口肌即口部肌肉，包括上下顎、唇部、舌頭及面頰活動控制上的肌肉。
口部感官訓練對於小朋友將來說話及吞嚥都好重要。
如果小朋友好怕被觸摸面部及口部，唔中意刷牙，成日流口水……
又或者唔中意試新食物，抗拒難咬既食物，甚至食野飲野容易咳或作嘔，
這些都是口肌有障礙的徵兆。
所以，訓練口肌或者滿足口肌感官都係好重要的。大個D既小朋友可以做吓吹波波同吹笛練習，但new born 階段都可以俾佢地多運用口部。
以用奶咀為例，專業意見都會覺得起初用奶咀，bb可以練習到口肌的張力，亦可以令BB理解多點吸吮的動作。
但大約在5-6個月期間，BB需要吸吮的本能反應就會減少，所以需要奶咀的幫助亦都應該降低。
同時，餵人奶既媽媽，亦有專業意見認為BB如果在頭1-2個月食奶咀，就會好容易將奶咀同媽媽的乳頭混淆，所以不建議給予奶咀。
所以總括來說就是3-6個月是可以給予奶咀既時間……
至於我自己，我認為小朋友其實有口肌嘅需要就應該畀佢滿足，所以隔咗兩個月等阿仔食慣人奶之後，我就已經畀佢食奶嘴啦
不過食得多與否，就係一個家長可以控制嘅地方!!!
對於caleb b嚟講，食奶嘴只係喺佢瞓覺嘅時間發生，每晚我都會畀個奶嘴佢，問佢要唔要呀?
問佢呢個動作其實係希望有一日佢發覺自己都唔需要奶咀都可以入睡,佢有呢個選擇權…
所以阿仔而家一見到奶咀就知道係瞓覺時間，亦都幫佢習慣routine structure~
咁平時又有咩口肌嘅練習呢？
如果手指乾淨嘅話，我都會畀佢食手指……亦都會買一啲牙膠畀佢咬，例如呢種
因為對於bb嚟講，手指…奶咀…牙膠嘅質感都唔同，對佢嘅口肌發展都係好好㗎
所以媽媽們，大家可以慢慢考慮吓唔同嘅理據，按bb 獨特既需要，決定需唔需要畀奶嘴你哋嘅BB， 更重要係畀嘅方法同埋質量都係好緊要既。
