*如果係你，你又會幫手嘛？*
*如果係你，你又會點同小朋友講？*
~*~*~*~*~*~*~*~*~*~*~*~*~*~*~*~*~*~*~*~*~*~*~
話說，某日我帶著小JM到商場閒逛之時，我地遇見一位老婆婆。
婆婆見我帶住小JM就對我講。。。
婆婆：可唔可以俾廿蚊婆婆買嘢食呀？婆婆好餓呀。
沿旁邊經過嘅叔叔、伯伯們都示意我地唔好幫忙、唔好理婆婆。
我 ：不如我去買麵包或嘢食俾你呀？
婆婆：唔好，你俾錢我就得架啦。
我 ：婆婆，你肚餓我都係買嘢食俾你啦。
婆婆：唉，你咁架。咁你買啦買啦，不過我唔食麵包架。
我 ：咁婆婆你想食咩呀？
婆婆：蛋撻。蛋撻啦咁。買三個
我 ：好呀，我地一齊搭電梯去買啦，就係下面咋麵包鋪。
婆婆：唔去，婆婆唔行啦，好攰。我就係度等你。
如是者，我就帶住小JM往電梯下層走向麵包鋪。
亦因為臨近下午茶時間，麵包鋪人流有點多，需要排隊等侯付款。
可惜，當我地買完蛋撻返到上層嘅時候，婆婆已經走咗，唔見咗蹤影。
小JM：媽咪，婆婆呢？啲蛋撻俾婆婆架。
我 ： 係喔。買俾婆婆架。我地睇下婆婆係邊，等一等。
小JM：媽咪，婆婆去咗邊呀？ 係咪肚餓啦？
經過一輪等侯，當媽嘅已經心裏有數，知道婆婆唔會返來，但當下最重要嘅反而係要諗點同小JM解釋。
原先小JM滿心歡喜咁去為婆婆買蛋撻，仲一路自己幫手拎想要親手交俾婆婆，
但倒頭來卻遇上一場被騙嘅鬧劇。。。
~*~*~*~*~*~*~*~*~*~*~*~*~*~*~*~*~*~*~*~*~*~*~
換咗係你，你又會點同小朋友解釋？~*~*~*~*~*~*~*~*~*~*~*~*~*~*~*~*~*~*~*~*~*~*~
等多一陣之後，我就提議小JM不如先去食下午茶先，稍後再睇下婆婆會唔會再返來。
沿路小JM顯得好小心翼翼，仲記得要好好保護啲蛋撻。
即使抵達食肆後，小JM亦無話想食啲蛋撻，一改平時為食嘅作風，
而且仲吩咐媽媽我都唔準食，話係要俾婆婆嘅。
到食完嘢，小JM依然一心想搵婆婆。。。
我唯有同小JM講：
我 ： 婆婆可能有急事突然要返屋企，所以等唔到我地買蛋撻俾佢。
小JM：咁婆婆會唔會肚仔餓架?
我 ： 唔會，婆婆會返屋企再食嘢，唔駛擔心。
小JM望一望啲蛋撻再望向我，我就同小JM講私我地晏啲可以一齊食，係俾小JM嘅小獎勵。
~*~*~*~*~*~*~*~*~*~*~*~*~*~*~*~*~*~*~*~*~*~*~
媽媽有感：
☘其實今次被騙只屬小事，我地只係花咗少許錢買蛋撻而已。
對於當媽嘅我而言，反而比較著緊小JM心裏面嘅想法，深怕小JM知道事情真相後會帶來壞影響。
怕處理不好會影響到小JM日後與人相處嘅關係及對別人嘅信任度，所以當媽嘅亦不能掉以輕心。
另一邊廂，我慶幸小妮子有一顆關愛之心，會記掛婆婆，亦算係一點安慰。
我依然相信『人性本善』，亦期望小JM將來可以保持呢份信念。
繼續係能力範圍之內去幫助有需要嘅人。
