孕前產後

未婚懷孕生好唔生好?

口罩男你好,我未結婚但大左肚,男朋友經濟唔穩定,佢話生唔生由我話事,佢會尊重我嘅想法,但我地根本無錢無可能擺酒結婚。我已經喊左幾日,我好想生,因為我為上個男友已經落左一個,但又驚生出嚟養唔起。口罩,我到底生定唔生好?

 

妹妹你好,坦白講,你呢個問題根本無標準答案,而且未知嘅因素太多。

我身邊有好多未婚懷孕嘅朋友,話生同唔生都有唔同原因,我當然可以將佢地嘅案例收集起嚟,變成數據答你,例如:「每100對未婚懷孕嘅人當中,生出嚟佔70%,然後呢70%當中,目前仲好幸福又唔後悔嘅佔50%,機會率都幾高架,妹妹你不仿生出嚟睇下。」我可以咁樣嗎?當然唔得呀,因為,

「人生根本就不能複製,都唔係用機會率就能解答嘅」

好多人驚BB生出嚟養唔起,因為大家知道,現代土地問題,養大一個細路到20歲要250萬,貴唔貴?超貴!養兩個仲要五百萬啊!但有時我都會問自己,如果當初我同老婆選擇唔生,落左我嘅女同仔嘅話,咁20年之後,我真係儲到500萬咩?

曾經因為「養唔起」呢三個字,而落左BB嘅朋友,五年、十年之後嘅你地,又儲到幾多錢呢?定都係欠債纍纍呢?

我曾經睇過一則新聞,一家五口,爸爸因為車禍走左,媽媽每日朝早五點去街市幫手,下昼炒散,晚上三個細路放學再一齊去執紙皮,辛唔辛苦?當然苦啦,我睇到都心疼,但媽媽從來無怨言,佢話再辛苦都要帶大三個仔。

聽到重點未?呢個係係一種「心智上嘅成熟,而且負責任嘅態度」,唔理前面條路幾難行,呢位媽媽都會咬緊牙關繼續走落去,永遠唔會放棄自己嘅小朋友。請問你同宜家嘅男朋友,會有呢種決心嗎?

有啲人,根本就無諗過要為生BB而放棄目前生活,甚至根本唔鍾意細路,但就由得個肚越嚟越大,最後夾硬生左出嚟,生出嚟之後就開始糟蹋佢、虐待佢、最後唔要佢,

「未婚生仔無所謂,有所謂嘅係,生完唔負責任嘅人,先最乞人憎。」

生定唔生,真係無一個標準答案,重點係你地兩個人,心態同後續嘅安排,到底有無準備好?

你睇網路上,每一張快樂家庭合照嘅背後,佢地所付出嘅心血同犧牲左嘅生活,並唔係外人可以想像嘅。

生出嚟嘅人,當生活辛苦嘅時候,都會話後悔生左;但落左嘅人,當咩都有嘅時候,唯獨再生唔出,又會後悔點解當初唔生出嚟呢?

人生就係咁嘎啦,為自己當初做左正確決定而開心;也會因為一些錯誤決定而後悔。但正所謂有早知,無乞衣,未來既野邊有人知架。

我答唔到你,究竟生定唔生好,但我希望你,如果決定要生,唔理生活幾辛苦,都請你好好愛你嘅小朋友、好好照顧佢,小朋友嘅成長過程,唔一定咩都要用到最好、最貴,唔係要俾佢一個上等人生活,而係要俾佢一個健全人格,陪伴和關係,比任何野都嚟得珍貴同重要。

如果決定唔生,我自己自私心態係覺得於心不忍,但每個人都有自己嘅路,我無辦法自私要求咩,甚至幫你嘅未嚟出主意,但我希望,以後響避孕呢方面,你同男朋友可以再小心一啲,畢竟,你肚入面個BB係最無辜嘅。

最後呢個問題嘅正確答案,我諗都係必須由你同男友,兩個自己傾掂數,加油!

Tags

MamaClub

媽媽最關心嘅食、衣、住、行、育、樂嘅大小資訊,無論妳喺邊個階段嘅媽媽、媳婦或者婆婆都可以喺度揾到妳需要嘅精彩內容。歡迎加入MamaClub我哋一齊分享「湊仔經」。
Back to top button
Close