教育育兒成長

養成小孩食飯的四大習慣!許多媽媽都教錯了

不知不覺我個寶貝仔恩恩已經三歲九個月了…老實講,三歲呢一年真係比一歲同兩歲的小朋友難搞。佢開始有自主意識,亦會開始反抗,會表達自己的諗法。

每日都有講唔完的說話,問唔完的問題…因為係男仔,所以對任何事都好奇,媽咪講的任何規矩佢都想破壞,成日要挑戰我極限。對於佢的反抗,我當然企硬!對就係對,不對的事就係不對…無任何矛盾點。

翁小恩係我第一個仔,從佢出世,我就睇左好多育兒書…我係親密派…注重孩子的感覺和諗法,但我都係非常嚴格的媽咪,尤其係教養上。

最近我遇到一個問題,也讓我反省左自己以前錯誤的做法。翁小恩係家裡第一個小孩,果時佢出世,兩邊家庭都好重視。我地同奶奶一齊住,翁小恩真係萬千寵愛集一身。不過小恩好乖,細細個時唔常喊,夜晚都一覺到天光。只係越大個,就越識睇人臉色。

到一歲之後,令我頭痛的問題就係食飯。食飯時無辦法好認真食,每次餵佢食飯,總係食得好慢,或者食幾啖就唔食。如果佢唔食,長輩就會擔心,點解唔食呀?唔食飯會肚仔餓架,快點諗辦法俾佢食,媽咪的壓力就來了!

如果孩子真係無食好多,長輩就會拎水果或點心俾佢食,這個問題養成左佢三年的食飯習慣,吃飯永遠係佢最痛苦的事(除非吃到佢鍾意食的垃圾食物),雖然佢會乖乖坐餐桌椅,但食飯永遠唔專心。

一餐飯要食勁耐,食飯永遠都係食最少,然後體重增加又最慢,呢個係我地最擔心的。我和恩恩爸爸成日討論這個問題,鬧又鬧過了,惡又惡過了,到底要點樣先可以令佢好好食飯?

教養

後來我搵左幾個原因,再慢慢去改變,發現食飯的狀況變好了。

第一:環境

無孩子之前,我地食飯時都係一家人一齊對住電視食,這係好正常的畫面吧。傾計,傾下電視新聞時事,一邊食飯,感覺好和諧可以增進感情。但對孩子而言,佢地的專注力會不由自主被電視吸引過去。

有一排只要有電視,翁小恩就會張開嘴俾你餵,剛開始為左令佢食飯,每次都順住佢意,俾佢睇電視,趕住餵完碗飯快高長大。當佢學識自己食飯,佢根本無辦法做到邊食飯邊看電視,成日呆呆望住個電視,手又唔郁,碗入面的飯又無郁。呢個習慣好可怕!因為一旦習慣左,食飯的模式就會變成咁。

改變:宜家為左以身作則,我地食飯時間都唔會睇電視,爸媽的身教好重要,陪住孩子一齊食飯都好重要。所以熄左個電視,一齊享受媽咪辛苦煮的美食。如果想玩、想睇電視,麻煩食完先再做!

第二:戒晒所有飯前零食

所有小朋友有鍾意食零食,成日在飯前向長輩要東西食。我媽咪都好鍾意塞野俾佢個孫食,成日俾我話,佢地個胃又唔大,食少少零食就飽左,永遠唔會覺得肚餓,正餐點會好好食呢?

改變:想食餅乾零食?食完飯先啦!食完正餐先可以食點心!所以我地屋企唔會有好多零食,唔好覺得我對孩子殘忍,因為佢唔食正餐令我更擔心痛苦。

第三:專心

小孩很容易被身邊的事物誘惑,所以邊食飯邊玩玩具係大忌!專心真係要慢慢訓練的,芯芯愛食飯,所以當飯碗一放到佢面前,佢就可以專心食完碗飯!但恩恩總係拎住筷子揮下揮下,再唔係就一直講野,講到唔記得食飯。

改變:教恩恩食飯時唔好講野,專心食完碗飯,再一齊食水果傾計。孩子仲細,唔知咩叫專心,我教佢睇住碗裡面的飯,睇住手上的筷子或湯匙送入嘴巴裡,慢慢佢就識啦!

第四:準時食飯?

以前因為要煮俾屋企人食,所以食飯時間都好固定,夜晚六點食晚飯,中午十二點食午飯。但係孩子真係肚餓嗎?有時候孩子睡得晏,食完早餐都十點幾,十二點又要食午飯,真係食得落咩?我自己都食唔落啦。

改變:現在如果孩子早餐食得晚,咁午餐或晚餐時間我會往後移,媽媽的壓力都唔使咁大,煮飯可以慢慢來。等孩子再有餓的感覺,再俾佢食飯,佢會食得更好。

現在我自己朝呢幾個方面改變左,過左一個月,翁小恩食飯的狀況慢慢變好,食飯比較快,也會比較認真食。

我知道我自己係嚴格,但規矩既野要從小建立。愛孩子有好多方式,但縱到佢為所欲為絕對唔係最好的愛。

現在恩恩就快四歲,我都常常教佢,自己食完水果,碗碟拎去鋅盤,玩具自己收好,唔小心尿濕條褲,要自己學識抹。孩子會長大,唔會永遠係強褓中的小嬰兒,放手俾佢去學,比幫佢做晒所以事情更好。我正在努力中,各位爸爸媽媽一起加油吧!

Tags

MamaClub

媽媽最關心嘅食、衣、住、行、育、樂嘅大小資訊,無論妳喺邊個階段嘅媽媽、媳婦或者婆婆都可以喺度揾到妳需要嘅精彩內容。歡迎加入MamaClub我哋一齊分享「湊仔經」。
Back to top button
Close