以家踏入轉天氣的季節，時冷時熱，真係令唔小人都會傷風、感冒。而且抵抗力比較無咁好的朋友，有時傷風、感冒之後都會再咳一排，特別係小朋友，佢地又唔識吐痰，好容易會因為d痰令佢地咳唔停。
不如簡簡單單煲個湯，用食療來「自療」呀。今次會用到龍利葉，味甘性平，功能清肺熱、治痰火咳嗽、失音喉痛，以完整大片質厚者為佳。一般踏進秋冬才算是龍利葉的當造期，我行咗好多菜檔都搵唔到，都最後去一d推車仔的婆婆檔口先買到。
龍脷葉對化痰止咳有不錯嘅，用龍脷葉配合南北杏、蜜棗煲湯飲，對咳同埋痰多嘅人都有幫助。如果係比小朋友想清感冒之後嘅咳嗽，可以加1-2個蘋果一齊煲，蘋果對潤肺都好有功效架，而且蘋果仲可以令d湯更甜，更加好味同易入口呢。
龍脷葉蘋果湯
材料:
龍利葉 10多片
南北杏 1兩
蜜棗 3-4 粒
蘋果 2個.
無花果 2粒
做法:
1./ 龍利葉、南北杏、無花果、蜜棗洗淨備用。
2./ 蘋果去皮，去核，切件備用。
3./ 鍋內注入清水，把所有材料放入煲內，用6碗水滾起後，以慢火煲1小時即可。
蘋果有解暑、除煩、開胃、生津的功效，秋冬都可以多煲蘋果。而南北杏就有止咳平喘，潤燥通便，蜜棗亦具有清心潤肺、調胃補血的益處。
如果係感冒收尾，唔想咁肥膩，可以唔加肉類來煲。
呢款湯清熱潤肺且平和，平時飲用都好有益架，全家都岩飲。如果當家常湯水，就可以加埋瘦肉一齊煲。
